Biz Kimik?

Azərbaycan Respublikasının Ədliyyə Nazirliyində, əmtəə birjası təşkilati-hüquqi formasında dövlət qeydiyyatına alınmış “İxtisaslaşdırılmış Əmtəə Birjası”nın nəzdində fəaliyyət göstərən 13.05.2008-ci il tarixdə təsis olunmuş “Əmlak Hərrac Mərkəzi” MMC-nin əsas fəaliyyət istiqamətlərini ehtiva edən Nizamnaməsinin 3.1-ci bəndinin tələbinə görə “Əmlak Hərrac Mərkəzi” müvafiq sifarişlər əsasında hərracların həyata keçirilməsi xidmətlərini göstərir. “Əmlak Hərrac Mərkəzi” MMC-nin yüksək ixtisaslı mütəxəssis heyəti tərəfindən“Əmlak Hərrac Mərkəzi” MMC-nin rəsmi internet saytı (eherrac.com) beynəlxalq standartların tələblərinə uyğun şəkildə hazırlanmışdır ki, bu rəsmi internet saytı vasitəsilə elektron hərracların təşkili, keçiriləcək hərracların izlənilməsi müasir tələblərə cavab verən şəkildə təmin edilir. “Əmlak Hərrac Mərkəzi” Məhdud Məsuliyyətli Cəmiyyəti Respublikanın bütün bankları və bank olmayan kredit təşkilatları ilə yüksək səviyyədə əməkdaşlıq edir. Azərbaycan Respublikasının Ədliyyə Nazirliyinin İcra Baş İdarəsinin müvafiq yazılı razılığı ilə Bakı şəhərinin bütün rayonlarının, eləcə də Respublikanın digər rayon (şəhər) İcra Şöbələri ilə ayrı-ayrılıqda bağlanmış “Hərracın təşkili haqqında” müqavilələrə əsasən İcra Şöbələrinin sifarişlərinə uyğun olaraq, “Əmlak hərrac Mərkəzi” MMC-ti tərəfindən müvafiq hərracların təşkili, həyata keçirilməsi və aidiyyəti qanunvericiliyə uyğun olaraq hərracların yekunlarının (nəticələrinin) rəsmiləşdirilməsi təmin edilir. Qanunvericiliklə müəyyən edilən hallar istisna olmaqla hərracların təşkili və həyata keçirilməsi Sifarişçi ilə hərrac təşkilatı arasında bağlanmış müvafiq müqavilə ilə, eləcə də “Əmlakın açıq hərracda satışı üzrə sifarişin verilməsi, hərracın təşkili, keçirilməsi və rəsmiləşdirilməsinin prosedur qaydaları” ilə tənzimlənir. Nəzərinizə çatdırılır ki, Məhkəmə qərarlarına əsasən rayon İcra və Probasiya Şöbələri tərəfindən göndərilmiş sifarişlər əsasında “Aqrarkredit” QSC-nə məxsus ipoteka predmeti olan 30-dan çox əmlak açıq hərracdan tam şəffaf satılması tərəfimizdən təmin olunmuşdur. “Əmlak Hərrac Mərkəzi” MMC-nin əsas fəaliyyət növü olaraq daşınar və daşınmaz əmlakların açıq hərracda satılmasının təşkil edilməsi hazırda qüvvədə olan Azərbaycan Respublikasının Mülki Məcəlləsi, “İpoteka haqqında” Azərbaycan Respublikasının Qanunu, “İcra haqqında” Azərbaycan Respublikasının Qanunun ilə tənzimlənir.